БИШКЕК, 28-дек. – Sputnik. 2023-жылдын 1-январынан баштап амбулатордук шартта көрсөтүлүүчү медициналык кызмат көрсөтүүлөрдүн жаңы прейскуранты күчүнө кирет. Бул тууралуу Милдеттүү медициналык камсыздандыруу фондунун (ММКФ) маалымат кызматы билдирди.
Кеп үй-бүлөлүк дарыгерлер борборлорунда, Жалпы медициналык практика борборлорунда, Жалпы ооруканалардын амбулатордук-диагностикалык бөлүмдөрүндө, ошондой эле Клиникалык диагностикалык бөлүмдөрүндө медициналык кызмат көрсөтүүлөр жөнүндө болуп жатат.
"Прейскурант акыркы жолу 2015-жылы, башкача айтканда, жети жыл мурда кайра каралган. Медициналык кызмат көрсөтүүлөрдүн наркын эсептөө инфляцияны, реагенттерге, лабораториялык изилдөөлөргө керектелүүчү материалдарга жана медициналык жабдууларга болгон баанын өсүшүн эске алуу менен жүргүзүлгөн. Такталган тизме изилдөөлөрдүн, анализдердин жана манипуляциялардын 740 түрүн камтыйт (мурда 410 болчу)", – деп айтылат билдирүүдө.
Тизмени түзүүдө лабораториялык диагностикалык изилдөөлөрдү (жалпы клиникалык, бактериологиялык, биохимиялык, иммунологиялык, ферменттик иммундук анализ) жана рентгенографиялык изилдөөлөрдү (санариптик, аналогдук) жүргүзүү ыкмалары эске алынган.
Бир катар категориялар: Үй-бүлөлүк медициналык борборунда катталгандар, камсыздандырылгандар жана мамлекеттик кепилдиктер программасында көрсөтүлгөн калктын жеңилдетилген категорияларындагылар лабораториялык, диагностикалык кызматтар үчүн төлөбөй турганы белгиленди.
"Калган жарандар көрсөтүлгөн медициналык кызматтын акысын тизме боюнча кассага төлөшөт", – деп билдирди маалымат кызматы.
Камсыздандыруу үчүн поликлиникалардан же ММКФтин аймактык бөлүмдөрүнөн ММК полисин алуу керек.