БИШКЕК, 27-дек. – Sputnik. Кыргызстанда эң керектүү продукциянын кору жетиштүү экенин министрлер кабинетинин төрагасынын орун басары Бакыт Төрөбаев билдирди. Бул туурасында өкмөттүн маалымат кызматынан кабарлашты.
Анын айтымында, Мамлекеттик материалдык резервдер фондунун кампаларында азык-түлүктүн: буудайдын, ундун, өсүмдүк майынын жана кумшекердин жетиштүү запасы бар.
"Мамлекеттик коопсуздукка тамак-аш коопсуздугу да кирет, муну эске алып, азык-түлүктү кошумча нарк салыгын (КНС) төлөөдөн бошотуу маселеси каралууда", – деди ал.
Төрөбаев ошондой эле "ун комбинаттарындагы буудайдын запасы түгөнө турган болсо, мамлекеттик материалдык запастагы кампаларда буудай жетиштүү" экенин кошумчалады.
Ал өсүмдүк майы жана кант тартыштыгы боюнча маселе жаралбастыгына ишендирди.
Күн караманы кайра иштетүү боюнча май заводдору менен сүйлөшүүлөр жүрүп жатканы маалым болду. Быйылкы жылы "Кошой" жана "Кайыңды Кант" заводдору 62 миң тонна кумшекер өндүргөн.
Буга чейин Кыргызстандын ун тартуучулар ассоциациясы 2023-жылдын 1-январынан тарта ун менен жемдин баасы 15 пайызга кымбатташы мүмкүн экенин билдирген.
Маалым болгондой, 2021-жылдын сентябрынан бери колдонулуп келе жаткан данды импорттоо жана кайра иштетүү боюнча жеңилдиктердин мөөнөтү (нөлдүк КНС) 31-декабрда аяктайт.
Тегирменчилер чек арадагы чыр-чатактарга жана коңшу мамлекеттердеги кырдаалга карабастан эң зарыл товарлардын баасы туруктуу болгондугунун себеби жогоруда айтылган жеңилдиктерден улам экендигин белгилешти.