БИШКЕК, 26-дек. — Sputnik. Бишкектеги "Газпром" мектебинин бүтүрүүчүлөрүнө Кыргызстандын да, Россиянын да аттестаты берилиши мүмкүн. Бул туурасында келишимдин долбоорун парламенттик Бюджет, экономикалык жана фискалдык саясат комитети биринчи окууда жактырды.
Макулдашууда мектепти ижара акысын төлөөдөн 20 жылга бошотуу да каралган. Мекеме соңку үч жылдан бери калаа мэриясына жылына 20 миллион сомдон ашуун төлөп келген.
Мектептин директору Татьяна Кузнецова муну менен "Газпром" өзүн-өзү каржылоого өтөрүн айтты.
"Биринчи бул мектепти куруп жатканда ижара төлөбөйбүз, акысыз окутууга квота беребиз деп макулдашканбыз. Бирок анда мэриянын жерди ижарасыз берүүгө укугу жок болгон экен. Биз үч жыл бою ижара да төлөп, майып балдарды дагы окутуп жаттык. Аларга 125 квота бөлүнгөн, бул окуучулардын 20 пайызын ээлейт. Буга чейин акысыз негизде майыптыгы бар балдарды гана алып келгенбиз. Эми ага аз камсыз болгон, көп балалуу үй-бүлөдөн чыккан жана жетим балдар дагы кошулууда. Анан эки аттестат берилип калса, Россиянын жогорку окуу жайларына оңой өтүүгө да жол ачылат", — деди Кузнецова.
Ошондой эле ал мектеп мэриянын эле балансында каларын кошумчалады.
Белгилей кетсек, 2019-жылы "Газпром Кыргызстан" компаниясы тарабынан борбор калаага мектеп курулуп, мэриянын менчигине өткөрүп берилген. Билим уясын курууга бир миллиарддан ашык рубль сарпталган. Буга чейин Бишкек мэриясы аталган мектепти каржылоого дарамети жетпей турганын билдирген.