БИШКЕК, 22-дек. — Sputnik. Ооруларды алдын алуу жана мамлекеттик санитардык-эпидемиологиялык көзөмөл департаментинин адистери эл арасында тараган грипп тууралуу мифтер жөнүндө айтып беришти.
Антибиотиктер гриппти дарылоого жардам берет
Болбогон кеп. Антиботиктер бактерияга гана таасир берет. Вирус менен бактериянын эч кандай байланышы жок, андыктан вирустук ооруларды, анын ичинде сасык тумоону антибиотик менен дарылоо натыйжа бербейт. Иммунитет алсызданган учурда вирустук инфекцияга бактериялык инфекция кошулуп калышы мүмкүн. Ошол учурда гана дарыгер антибиотиктерден турган дарылоо курсун жазып берет.
Суук — грипптин пайда болушунун негизги себеби
Грипп — бул вирустук инфекция. Вирустар болсо аба аркылуу жугат. Андыктан бут үшүгөн учурда, суук тийгенде же балмуздак жегенде тумоолоп калуу мүмкүн эмес.
Тумоолоп бүткөн соң иммунитет күчтөнөт
Көпчүлүк бир жолу ооруп бүткөндөн кийин кайрадан оорубайм деп ойлойт. Бирок бул жаңылыштык. Вирус жыл сайын өзүнүн генетикалык курамын өзгөртүп турат, андыктан кайрадан илдет жугузуп алуу кооптуулугу бар.
Грипп кооптуу эмес, аны дарылабай эле койсо болот
Бул дагы миф. Грипп — өтө кооптуу оорулардын бири. Ал тургай жаш балдар менен карылардын өлүмүнө алып келген учурлар да катталат. Андан тышкары, грипптин кесепети оор болушу мүмкүн. Ал адатта жүрөк-кан тамыр системасын жабыркатып, өмүрдү бир нече жылга кыскартышы ыктымал.