БИШКЕК, 21-дек. — Sputnik. Бишкек шаарынын таштанды полигонун курууда жоголгон 22 миллион евронун дайынын иликтеген депутаттык комиссия корутундусун УКМКга жөнөттү.
Белгилей кетсек, 2013-жылы Европа реконструкциялоо жана өнүктүрүү банкы таштанды жайларын рекультивациялоого жана жаңы полигон курууга 22 миллион евро бөлгөн. Бирок ал долбоор ишке ашкан эмес. Мындан улам апрель айында депутаттык комиссия түзүлгөн.
Топтун төрагасы Мирлан Самыйкожонун айтымында, полигон боюнча беш кылмыш иши ачылган. Анын экөө сотко жөнөтүлгөн, эки киши издөө, бир иштин иликтенип жаткан учуру.
"22 миллион евронун изи боюнча жумуштар кандай жыйынтыкталат деген күмөндүү суроолор болгон. Таштанды талаасынын жери 45 гектардан 75 гектарга чейин кеңейген. Ал жерге 270 чарчы метрлик кеңсе 10 миллион сомго салынганы белгилүү болду. Tana аттуу техника 387 миң еврого сатып алынган. Бирок бузулуп үч жылдан бери иштебей турат. Оңдоого 30 миң евро талап кылынат. Ал эми өзүбүздүн ошол жердеги эки тракторду оңдоого 217 миң сом керек", — деди Самыйкожо.
Ошондой эле ал аталган иш боюнча ИИМ, прокуратура, Эсеп палатасы тарабынан дагы натыйжа болбой жатканын белгиледи.
"Мындан улам биздин комиссия Эсеп палатасынын долбоорго аудит жүргүзүшүн талап кылат. Кылмыш иштерин кароодо мамлекеттик органдар тарабынан көзөмөлдүн жоктугун, тиешелүү чараларды көрүү создугуп жаткандыгын эске алып, көзөмөл кылуу үчүн материалды УКМКга өткөрүп берет. "Эмне үчүн УКМКга?" дешиңер мүмкүн. Ушунча жылдан бери иш аягына чыкпай жатса, ИИМ, прокуратура, Эсеп палатасынын алы жетпей калса, анда эртеңки келечегибиз, саламаттыбыз үчүн УКМК карасын деген жыйынтыкка келдик", — деди депутат.
Натыйжада депутаттык комиссиянын корутундусу парламент тарабынын жактырылып, токтом кабыл алынды.