Кыргыз фондулук биржасынын соода көлөмү 17 миллиард сомдон ашты. Бул өткөн жылдагы көрсөткүчтөн эки эсеге көп. Бул тууралуу Медет Назаралиев Sputnik Кыргызстан радиосуна маек куруп жатып билдирди.
Анын айтымында, президенттин жарлыгы өлкөгө узак мөөнөттүү инвестиция тартууга мүмкүндүк түзөт.
"Президенттин жарлыгы Кыргыз фондулук биржасынын көрсөткүчтөрү өсүп жатканда чыкты. Алсак, фонддун соода көлөмү 17 миллиард 512 миллион сомго (баалуу кагаздар 16 миллиард 742 миллион сом, товардык сектор 770 миллион сом) жетти. Бул өткөн жылдагы көрсөткүчтөн (9 миллиард 800 миллион сом) эки эсеге чукул ашканын билдирет. Мындан тышкары, быйыл листинг тизмесине кирген компаниялардын саны өстү. Аны капиталдаштыруу 34 пайызга өсүп, листинг тизмесинде турган акциялардын көлөмү 70 миллиард сомго чукулдады. Ошондой эле мамлекет тарабынан түзүлгөн компаниялар листинг тизмесине кирип, биржа аркылуу уставдык капиталдарын көбөйтүүдө. Андан тышкары, Улуттук банк менен келишим түзүлүп, биржада алтын куймалар сатылууда. Быйыл жеке банк тарабынан социалдык-гендердик облигация чыгарылды. Ал эл аралык стандартка төп келет. Андан түшкөн каражат ишкер айымдарга төмөн пайыз менен берилет. Ошондой эле эки-үч компания "жашыл облигацияларды" чыгарууга белсенүүдө. Андан түшкөн акча экологияга терс таасирин тийгизбей турган долбоорлорго жумшалат", — деди Назаралиев.
Ошондой эле ал жарандарга акция сатып алууну жеңилдетүү үчүн мобилдик тиркеме иштеп чыгуу пландалып жатканын кошумчалады.