БИШКЕК, 20-дек. — Sputnik. Кыргызстандын Улуттук банкы бүгүн, 20-декабрда, валюта рыногуна 87,5 миллион доллар сатты.
Бул финансы рыногун жөнгө салган органдын тарыхында рекорддук көрсөткүч. Буга чейин эң ири интервенция жыл башында, 27-январда жасалып, 86,5 миллион доллар сатылган болчу.
Буга чейин Улуттук банк накталай америкалык валютанын тартыштыгы жаралып жатканын, ал эми накталай эмес түрүндөгүсү жетиштүү экенин билдирген. Адатта интервенция тууралуу маалыматта накталай эмес түрүндөгү операциялар көрсөтүлөт.
Быйыл башкы банк сегиз жолу чет элдик валюта сатып, анын жалпы суммасы 419 миллион 850 миң долларга жетти. Ал эми жети жолу сатып алды, анын суммасы 190 миллион 740 миң долларды түзөт.
Алтын валюта запасы (эл аралык валюта резерви) Улуттук банктын сомдун курсун туруктуу көзөмөлдөп туруусуна мүмкүнчүлүк берет. Ал ондогон валюталардан турат: SDR (Атайын карыз алуу укугу – Эл аралык валюта фондунун (ЭВФ) жасалма резерви жана төлөө каражаттары) жана алтын.