БИШКЕК, 20-дек. — Sputnik. Министрлер кабинетинин төрагасынын орун басары Бакыт Төрөбаев Санариптик өнүктүрүү министрлигинин коллегиясына катышты, анда ведомствонун быйыл аткарылган ишинин жыйынтыгы жана 2023-жылга карата милдеттери каралды. Бул туурасында өкмөттүн маалымат кызматы билдирди.
Төрөбаев экономиканын айрым тармактарында жана социалдык чөйрөдө жасалма интеллект технологияларын колдонуунун эксперименталдык укуктук режимдерин киргизүү керектигин айткан.
"Ар бир мамлекеттик орган санариптештирүү жана кызматтарды өз алдынча киргизүү жолу менен кете берсе, буга жетишүү мүмкүн эмес. Бардык иш-аракеттерди координациялоо жана Борбордук Азия чөлкөмүндө санариптик инновацияга айланган маалыматтарды жана инфраструктураны көзөмөлдөй турган Санариптик кодексти иштеп чыгуу зарыл", — деди Төрөбаев.
Ошондой эле ал "техниктер" менен юристтер ортосундагы түшүнбөстүктөн улам маселе жаралып жатат деп эсептейт.
"Биз бул түшүнбөстүктүн себебин чечүүгө жетишерибиз менен санариптик трансформация жана жасалма интеллектини жашоого киргизүү процесстерин аймактык деңгээлде дагы эч нерсе басаңдата албайт. Өлкөдөгү санариптик трансформация ар бир жаранга, экономиканын жана социалдык чөйрөнүн бүт тармагына жана мамлекеттик башкаруунун бүткүл системасына жетиши керек. Мунун баары адамдардын жашоо деңгээлин жогорулатышы зарыл", — деди Төрөбаев.
Соңунда аткаминер мамлекет менен санариптик коомчулуктун диалогу документтерге кол коюу жана отчет берүү менен чектелбеши керектигин белгилеген.