Актёрдун жаназасы Бишкек шаарындагы үйүндө окулуп, андан соң өзү өмүр бою иштеп, балалыгы өткөн Кыргыз улуттук драма театрында коштошуу зыйнаты өттү. Ага министрлер кабинетинин төрагасынын орун басары Эдил Байсалов, маданият, маалымат, спорт жана жаштар саясаты министри Алтынбек Максутов, маданият ишмерлери, сахналаштары жана туугандары келип кино жана театр жылдызын акыркы сапарга узатышты. Андан соң сөөгү "Ала-Арча" көрүстөнүнө коюлду.
КРдин эмгек сиңирген артисти Азиз Мурадилаев 44 жашта эле. Ал боор циррозу менен жабыркап көптөн бери ооруп жүргөн, соңку күндөрү абалы начарлап, реанимацияда жаткан. Актёрдун боорун алмаштырууга 45 миң доллар керектелип, акчанын көп бөлүгүн мамлекет башчы Садыр Жапаров бөлүп берген. Операцияны чет өлкөдөн жасоо пландалып жаткан. Тилекке каршы, ал күнгө жетпей 17-декабрда көз жумду.
Мурадилаев кыргыз киносу жана театрында көптөгөн ролдорду жаратып, өзгөчө Садык Шер-Нияздын "Курманжан датка" тасмасында Алымбек датканын ролу менен эсте калат. Маркумдун артында энеси, жубайы жана эки уулу калды. Актер үй-бүлөдө жалгыз бала болгон, атасы Үсөн Мурадилаев да 42 жашында акка моюн сунган.
Залкар талант быйыл сентябрда Sputnik Кыргызстанга маек берип, аны сахна дарылай турганын айткан эле.