БИШКЕК, 17-дек. — Sputnik. Мэрди кызматтан алып койсок эле түтүн жоголуп кетпейт, ышты көзөмөлгө алганга жалпы эл өзү жардам бериш керек. Бул тууралуу президент Садыр Жапаров "Кабар" улуттук агенттигине берген маегинде билдирди.
Мамлекет башчы жакында эле тик учак менен шаардын үстүн, жаңы конуштарды эки-үч жолу айланып, үстүнөн баарын көргөнүн айтты. Ал тургундар резина, чүпүрөктөрдү жага берип, абаны булгап жатат деп эсептейт.
"Бишкек ЖЭБдин (ТЭЦтин) түтүнү абанын булганышына болгону 10-15 пайыз таасир этет. Калган түтүндүн баары жаңы конуштардан, жеке сектордогу сауналардан, мончолордон чыгып атат. Алар резина же тигүүчү цехтерден чыккан чүпүрөктөрдү жагат экен. Ошондуктан кошуналары көзөмөлгө алып, жактырбаш керек. Анткени ал түтүн ар бир жашоочунун ден соолугуна зыян алып келет. Ошол үчүн мейли кошунасы болосуңбу же көчөдөн өтүп бара жатып көрүп каласыңбы, айтыш керек. Тиешелүү органдарга билдирүү зарыл. Ошондо гана түтүн жоголот", — деди Жапаров.
Президент бийлик дагы жөн жатпай дароо буйрук берип, рейд уюштурганын белгиледи.
"Ким жеке сектордо мончого же үйүнө резина же чүпүрөк жагып жаткан болсо, айып пул салгыла, сауна болсо жапкыла дедик. Бирок эл өзү көзөмөлгө алып берсе, рейдден дагы жакшы жыйынтык болот эле. Азыр жаңы конуштарда жеке менчик мончолор көп экен. Ошол мончолордо жагылат экен. Азыр эми конуштарга өкмөт тараптан мончолорду салдырганга тапшырма бердим", — деди мамлекет башчы.
Ошондой эле ал учурда 50гө жакын кичи жана орто ГЭС курулуп жатканын, баары бүтсө, көпчүлүк электр энергияга өтүп кетсе, шаар түтүндөн кутула турганын кошумчалады.