БИШКЕК, 16-дек. — Sputnik. Евробиримдик Россияга каршы санкциялардын тогузунчу пакетин макулдашты. Бул тууралуу РИА Новости "Франс Пресс" басылмасына таянып жазды.
Анда санкциялар боюнча макулдашуу Евробиримдик лидерлеринин Брюсселдеги саммитинин алкагында жетишилгени айтылат. Ошондой эле ЕБдин жыйынтыктоочу билдирүүсүндө Россияга каршы санкциялык саясат мындан ары да күчөтүлөрү жазылган.
Тогузунчу пакет жума күнү расмий тастыкталат. Андан соң санкциялар биримдиктин расмий журналына жарыяланып, күчүнө кирет.
Еврокеңештин башчысы Шарль Мишель Россияга каршы санкциялардын жаңы пакети боюнча макулдашууну ырастаган. Ал эми Польшанын премьер-министри Моравецкий Евробиримдиктин жеке санкциялары 200гө жакын россиялыкка киргизилип, кош максатта колдонулуучу товарларга да чектөөлөр болорун кошумчалаган.
Буга чейин Украинадагы абалга байланыштуу Москвага каршы санкциялардын сегиз пакети кабыл алынган. Президент Владимир Путин Россияны ооздуктап алсыратуу Батыштын узак мөөнөттүү стратегиясы экенин айтып келет. Ал белгилегендей, АКШ менен Европанын негизги максаты — миллиондогон адамдардын жашоо шартын начарлатуу.