БИШКЕК, 15-дек. — Sputnik. Депутаттар маселе көтөрсө эле Бишкектин абасы тазаланып калууда, мунун сыры эмнеде? Жогорку Кеңештин депутаты Шайлообек Атазов жыйында ушундай суроо салды.
Эл өкүлү "шаарды ыштан арылтуу үчүн маселе күнүгө парламентте каралып туруш керекпи" деп сындады.
Экология министри Динара Кутманова ыш капташы абанын температурасынан көз каранды экенин айтып, суукта, ным болгон учурда көп сезилерин белгиледи.
Андан соң Атазов канча автоунаа катализатору жок жүргөнүн сурады. Ички иштер министринин орун басары Эркебек Аширходжаев учурда муну текшерүүгө укугу жоктугун билдирди. Себеби техникалык кароодон өткөрүү нормасы мыйзамдан алып салынган.
Мындан сырткары, депутат Бишкек ТЭЦинен чыккан түтүн абаны булгап жатканын айтып, жагылган көмүрдүн сапатынан шек санады. Бирок энергетика министри Таалайбек Ибраев көмүрдү лабораториялык текшерүүдөн өткөрүп ала турганын, абанын булганышында ТЭЦтин үлүшү 10 пайыздай гана болорун белгиледи.