БИШКЕК, 14-дек. — Sputnik. Кыргызстандын Улуттук банкы АКШнын Финансы министрлигинин чет элдик активдерди көзөмөлдөө башкармалыгынан (OFAC) "Мир" картасын колдонуу боюнча кат албаганын билдирди.
Эскерте кетсек, өткөн аптада АКШнын Финансы министрлиги Казакстандын банктарына "Мир" картасы менен операция жүргүзүүгө уруксат берген. Мында кеп "Мир" картасын төлөм жүргүзүүдө, акча которууда жана банкоматтан алууда колдонуу тууралуу болууда. Мындан улам Sputnik Кыргызстан Улуттук банктан аталган карта боюнча кат алган-албаганын сурап көрдү.
Башкы банк Кыргызстандын мыйзамдарына ылайык банктардын жана банктык эмес финансы-кредиттик уюмдардын, ошондой эле юридикалык тараптардын ишмердүүлүгүнө кийлигишпей турганын эскертти.
"Кыргызстан коммерциялык банктары өлкөнүн укуктук-нормативдик ченемдеринин талабына ылайык кандай система менен иштээрин өздөрү чечип, төлөм системалары менен иштөөдө болчу тобокелдиктерди да өздөрү баалайт. Улуттук банк OFAC башкармалыгынан эч кандай кат алган эмес", — деп айтылат жоопто.
Эскерте кетсек, Кыргызстандагы 22 банктын 11и россиялык төлөм системасынын карталарын тейлөөнү токтотконун жар салган.