Бишкек мэриясы 23-ноябрдан баштап жаңы жылдык иш-чараларга даярдык көрүп баштады. Бул тууралуу Урмат Белекбаев Sputnik Кыргызстан радиосуна маек куруп жатып билдирди.
Анын айтымында, майрамдык иш-чаралардын эң алгачкысы — борбордук аянттагы башкы балатыны жандыруу.
"Жаңы жылга карата Бишкек шаарында жылдагыдай эле көптөгөн иш-чараларды уюштурууну пландап жатабыз. 23-ноябрдан баштап майрамдык саамалыктарга даярдык көрүлүп баштады. Бекитилген план боюнча учурда ишке ашырууга аракеттер жүрүүдө. "Тазалык" муниципалдык ишканасынын кызматкерлери "Ала-Тоо" аянтына башкы балатыны коюп, жасалгалап жатышат. Быйыл өзгөчөлөнүп балаты аянттын түштүк тарабына коюлду. Жаңы жылга карата эң алгачкы иш-чарабыз башкы балатыны жандыруу болот. Азыркы кезде так күнү белгилене элек. Ал күнү театралдашкан оюн-зоок жана концерт уюштурулат. Шаар тургундарын чакырып, башкы балатыны калаа башчысы менен чогуу жандырабыз", — деди Белекбаев.
Ал, мындан тышкары, Бишкектеги төрт райондо балдар үчүн да бир катар саамалыктар өтө турганын кошумчалады.