БИШКЕК, 13-дек. — Sputnik. Украинадагы жаңжал аяктагандан кийин Россия менен экономикалык кызматташуу мүмкүн болушу керек. Бул тууралуу Германиянын канцлери Олаф Шольц Берлинде Чыгыш Европанын экономикалык карым-катнаштары боюнча комитетинде сүйлөп жатып айтканын РИА Новости Zeit гезитине шилтеме берип жазды.
"Германиянын канцлери Украина тынчыгандан кийин Россия менен экономикалык кызматташтыкты калыбына келтирүүнүн келечеги тууралуу сүйлөдү", — деп жазылган гезитте.
Шольцтун айтымында, Россияга да согуш бүткөн соң экономикалык кызматташууну баштоо үчүн мүмкүнчүлүк керек. "Бирок азыр эмес", — деп тактады ал.
Канцлер учурда Россия менен Германиянын мамилеси салкындап баратканын кошумчалады. "Эми биз санкцияларды күчөтөбүз", — деп эскертти канцлер.
Ал ошол эле учурда Украинадагы жаңжал аяктагандан кийин да Россия Европа континентиндеги эң ири өлкө бойдон кала берерин кошумчалады. "Ошондуктан бул убакытка даярдануу абдан маанилүү", — деп сөзүн жыйынтыктады Шольц.
Россия Украинада аскердик атайын операциясын 24-февралда баштаган. Президент Владимир Путин анын максатын "сегиз жылдан бери Киев режими тарабынан зордук-зомбулукка жана геноцидге дуушар болгон адамдарды коргоо" деп атады. Анын айтымында, "Украинаны демилитаризациялоо жана денацификациялоо" жүргүзүп, Донбасста "жай тургундарга каршы кандуу кылмыштарга" жооптуу бардык согуш кылмышкерлерин жоопкерчиликке тартуу керек.