БИШКЕК, 12-дек. — Sputnik. Чеченстан лидери Рамзан Кадыров UFC президентинен кечирим сурашын жана дагестандык мушкер Магомед Анкалаев менен польшалык Ян Блаховичтин беттешин бир сыйра карап чыгууну талап кылды.
"Дана Уайт, сага эмне болгон? Принципке турган, дурус эле эркек элең го. Ал эми бүгүн чыныгы жеңүүчүгө татыктуу чемпиондук курун тапшырбай, рингден алып кетип калдың. Же саясат UFC рингине жетип, калыстардан ыпластыкты талап кылып жатабы? Бул деген спорт. Абийирдүү бол. Эй, Дана Уайт, эмне болуп жатасың? Өзүңдүн жана лиганын жүзүнө көө жаппа. Кемчилигиңди мойнуңа алып, курду чыныгы жеңүүчүгө бер да, бул оюн үчүн кечирим сура", — деп жазган Кадыров өзүнүн Telegram-каналына.
Жарым оор салмактагы дагестандык мушкер Магомед Анкалаев менен польшалык Ян Блаховичтин UFC чемпиондугу үчүн кармашы кечээ тең чыгуу менен аяктаган. Көп эксперттер менен күйөрмандардын баамында россиялык спортчу жеңген. Кармаштын жыйынтыгын жарыялаганда трибунадагылар нааразылыгын билдирген. Ал эми польшалык мушкер атаандашы артыкчылык кылганын моюндап, чемпиондук наамды Анкалаевге берүүнү да айткан.