БИШКЕК, 12-дек. — Sputnik. Кыргызстан менен Россиянын эриш-аркак жылы расмий түрдө жабык деп жарыяланды. Бул тууралуу маданият, маалымат, спорт жана жаштар саясаты министри Алтынбек Максутов билдирди.
Жабылыш аземи Токтогул Сатылганов атындагы Кыргыз улуттук филармонияда өтүүдө.
Россиянын маданият министринин орун басары Владимир Осинцев министр Ольга Любимованын кайрылуусун окуп берди. Ал мамлекеттер аралык мамилелерди чыңдоодо маданият негизги ролду ойноорун белгилеген.
“Негизги кадамдардын бири — маданият ишмерлеринин ортосунда достук мамиле менен бекем байланыштын чыңдалышы. Эки өлкөнүн адеп-ахлактык баалуулуктарын маданият сактап турат деп айтууга болот”, — деп айтылат кайрылууда.
Осинцев өз сөзүндө кыргызстандыктарды эл жазуучусу Чыңгыз Айтматовдун туулган күнү менен куттуктады. Ал бүгүн 94 жашка чыкмак.
Маданият министри Алтынбек Максутов Россия Кыргызстандын негизги жана ишенимдүү өнөктөшү болуп келгенин жана болуп кала берерин, эки өлкөнүн ортосундагы мамилелерде маданий-гуманитардык кызматташтык маанилүү орунду ээлей турганын эске салды. Ал эриш-аркак жылды жабык деп жарыялады.
Азем концерттик программа менен коштолду. М.Е.Пятницкий атындагы мамлекеттик академиялык орус элдик хорунун, Адыгеянын мамлекеттик академиялык “Нальмес” элдик бий ансамблинин, Саха (Якутия) Республикасынын “Зверев-Кыыл Уола” улуттук бий театрынын артисттери өнөрүн көрсөттү.
Кыргызстан менен Россиянын эриш-аркак жылынын салтанаттуу ачылыш аземи 2020-жылдын февраль айынын аягында болуп, ага мамлекет башчылары катышкан. Жыл ичинде биргелешкен 221 иш-чара пландаштырылган.