БИШКЕК, 12-дек. — Sputnik. Россия мунайынын баасына коюлган чектөөлөрдөн азырынча сезилерлик жыйынтык болгон жок. Бул тууралуу Сауд Арабиянын энергетика министри, ханзаада Абдулазиз бен Сальман Эр-Рияддагы форумда билдиргенин РИА Новости Taqa порталына шилтеме берүү менен жазды.
"Россия мунайына жогорку баа коюу боюнча 5-декабрда күчүнө кирген норма боюнча айтсак, азырынча анын натыйжасы байкала элек. Ошондой эле ал ишке ашырылышына толук ишеним жок. Дүйнөлүк мунай рыногундагы кырдаалды карап жатканда мындай санкцияларга Москванын кандай реакция кыларын эске алуу шарт. Аталган чектөөлөр саясий өңүттө колдонулуп жатат, бирок анын жардамы менен көздөгөн натыйжасына жете алабы азырынча белгисиз", — деп айткан министр.
Мунайга киргизилген санкциянын чоо-жайы
Россия Европага нефтинин негизги жеткирүүчүсү болуп, континенттин аталган сырьёго болгон муктаждыгынын 20 пайызын жапчу. Бирок Украинадагы атайын операцияга жооп иретинде Батыш мамлекеттери рестрикцияларды иштеп чыккан, анын ичинде Москванын мунай экспортунан көрчү пайдасын чектөө да бар.
Евробиримдик жай айларында санкциялардын алтынчы пакетин кабыл алган, анын алкагында Россиядан нефти продукцияларынын деңиз менен ташылуусуна эмбаргону этап-этабы менен киргизүү каралган. Чечим боюнча чектөө 5-декабрда толугу менен ишке ашмак. Ал эми нефть продукциясы үчүн өткөөл мезгил узагыраак болуп, толугу менен 5-февралда күчүнө кирет.
Алгач Евробиримдик өлкөлөрү, анын артынан G7 мамлекеттери менен Австралия Россиядан өндүрүлгөн мунайдын бир баррелинин баасын 60 доллардын чегинде бекиткен. Бирок аталган нарк өйдө-ылдый болушу мүмкүн экени айтылган. Мындай процедура январдын ортосуна белгиленди, бирок бул үчүн ЕБдин бардык мүчөлөрүнүн макулдугу керек.
Президент Владимир Путин Батыштын аракетине комментарий берип жатып, Россия өз кызыкчылыгына каршы келе турган болсо чет жакка эч нерсе сатпай турганын эскерткен.