БИШКЕК, 9-дек. — Sputnik. Россия президенти Владимир Путин 2023-жылы ЕАЭБди өнүктүрүү приоритеттерин атады.
Ал Бишкекте болгон Жогорку евразиялык экономикалык биримдиктин отурумунда сүйлөдү.
Келерки жылы биримдикке Россия төрагалык кылат.
Путин самитте ЕАЭБди өнүктүрүү боюнча стратегиялык багыттарды активдештирүү керектигин билдирген. Евразиялык интеграцияны өнүктүрүүнүн базалык документи 2025-жылга чейин каралган. Ошондой эле президент орто жана узак мөөнөттүү перспективаны багыттоочу стратегиялык документтерди иштеп чыгууга киришүү керектигин айткан.
Мындай багыттардын бири катары Россия биримдиктин өлкөлөрүнүн технологиялык суверенитетин бекемдөөнү жана негизги өнөр жай, технологиялык тармактарда бирдиктүү инновациялык базаны түзүүнү карайт.
"Маалыматтык технологияларды биргелешип киргизүү боюнча аракеттерди улантуу максаттуу болот. Ага биримдик мамлекеттеринин ведомстволорунун ортосунда транспорттук жана бажылык маалыматтарды автоматтык түрдө алмашууну, ошондой эле товарларды маркалоо жана көзөмөлдөөнү биргелешип киргизүү боюнча аракеттерди улантуу кирет. Бул жерде санариптик чечимдер биримдиктин рыногунда кооптуу товарлардын жана сапаты начар продукциялардын айлануусуна бөгөт коюуга жардам берип жатат", — деди Путин.
Ал ЕАЭБдин ишин инвестициялык кызматташтыкты курууга, өз ара инвестициялоо үчүн жагымдуу шарттарды түзүүгө, тиешелүү административдик процедураларды жөнөкөйлөтүүгө жана инвесторлордун укуктарын коргоо кепилдигин жогорулатууга багыттоону сунуштайт.
Россия ЕАЭБ өлкөлөрүндөгү салыкты жөнгө салуу режимдерин шайкештөө мындай иштин ажырагыс бөлүгү деп эсептейт. Бул үчүн бир эле мезгилде салыктык көзөмөлдөөнүн прогрессивдүү механизмдерин киргизүү пландаштырылууда.
"Россиянын төрагалык алдында өтө турган саммитте илим, техника жана билимге байланыштуу маселелердин үстүндө иштөөгө басым жасалат. Кесиптештерибизден студенттердин академиялык жана тажрыйбалык алмашуусу тууралуу идеяларды күтөбүз. Интеграциялык күн тартибине ишкердүүлүк, ыктыярчылык, маданият жана спорт жаатында долбоорлорду колдоо менен жаштарды туризм, тарых, социалдык жана этникалык баалуулуктар аркылуу тартууну пайдалуу деп ойлойбуз", — деди Путин.
Владимир Путин Россия ЕАЭБдин эл аралык ишкердик байланыштарын активдештирүүнү кубаттаарын жана чет өлкөлүк өнөктөштөр менен преференциалдык жана преференциалдык эмес келишимдердин спектрин кеңейтүүгө салым кошорун айтты.