Кыргызстандын бажы тармагы тез арада толук кандуу санариптештирилсе экономикага чоң пайда алып келет. Бул тууралуу Максат Мамытканов Sputnik Кыргызстан радиосуна маек куруп жатып билдирди.
Анын айтымында, товарларды кызматкер эмес, санарип технологиялар текшериш керек.
"Учурда өтүп жаткан инвестициялык саммитте бир гана ЕАЭБ өлкөлөрүнө тийиштүү маселелер эмес, бүткүл дүйнөгө байланышкан маселелер талкууга алынып жатат. Өзүм иштеп жаткан тармак боюнча айта турган болсом, быйыл 30 жылда болбогон ишти жасап, тарых жараттык. Кыргыз-өзбек чек арасындагы "Достук" өткөрүү пунктун жаңылап, толук санарипке өткөрдүк. Бул абдан жакшы жетишкендик. Эми өлкөбүздөгү калган өткөрүү пунктуларын да тез арада санариптик системага өткөрсөк экономкага чоң пайда алып келмек. Чек арадан өтүп жаткан товарларды кызматкерлер эмес, технология текшериш керек. Мындай жол менен убакытты үнөмдөп, коррупцияны жок кыла алабыз. Кыргызстандын бажы тармагы артта калган жок, бирок алдыда жасай турчу иштер да абдан көп. Алдыңкы өлкөлөр санариптештирүүнүн натыйжасында экономикасын бир канча эсеге жогорулата алышты. Мисалы, буга чейин Россияда 700дөн ашык өткөрүү бекеттери иштеп келген болсо азыркы кезде алардын саны кыскарып, болгону 16 электрондук ресурс көзөмөлдөп жатат", — деди Мамытканов.
Ал саммиттин негизги максаты ишкерлердин бири-бири менен таанышуусуна аянтча болуп, ишеним жаратып, өлкөгө акча тартуу экенин кошумчалады.