БИШКЕК, 8-дек. — Sputnik. Жогорку Кеңештин депутаты Алишер Козуев коммерциялык банктарды текшерип, кылмыш ишин козгоого чакырды.
Эл өкүлү Улуттук банк доллардын курсун кармаш үчүн улам интервенция жасап жатканын, бирок коммерциялык банктар жазылбаган мыйзамдар менен иштеп калганына нааразы болду.
"Урматтуу УКМК, Ички иштер министрлиги, ушул маселени тыкыр көзөмөлгө алсаңыздар. "Убактылуу эреже" деп доллар которсо экиден беш пайызга чейин комиссия алып, анан берип жатат. Сом менен алса ал нерсе жок экен. Мисалы, 100 миң доллар которсо 2000ден 5000 долларга чейин кармап калууда. Бул мыйзамсыз, аларга кылмыш ишин козгош керек. Ошол ишкер 100 миң доллар которуп алып, бир ай иштесе да анча пайда таппайт. Эмнеге көзөмөлдөбөй жатасыздар? Орто жолдо канчалаган ишкер кыйналууда", — деди Козуев.
Укук коргоо органдарынын жетекчилери бул маселени эске ала турганын айтышты.
Ал эми Улуттук банктын төрагасынын орун басары Заир Чокоев банктарды туруктуу негизде көзөмөлдөп турушарын белгиледи.
Анын айтымында, жыл башынан бери 131 текшерүү жүргүзүлгөн. Жыйынтыгында жазуу түрүндө 60 эскертүү, 13 оозеки эскертүү, 13 сунуштама берилип, кээ бирине айып пул салынган. Ноябрда эле 10 текшерүү болуп, жетөөнө эскертүү берилген.