БИШКЕК, 7-дек. — Sputnik. ИИМ айдоочулардан 8-9-10-декабрь күндөрү оор жана өзгөчө кооптуу жүктөрдү ташыган чоң автоунааларды айдабай убактылуу токтотуп турууну өтүндү. Бул туурасында ЖКККББнын маалымат кызматынан кабарлашты.
Буга Бишкекте 8-декабрь күнү инвестициялык форум, 9-декабрда Евразиялык экономикалык кеңештин жыйыны өтөрү себеп болгон.
"Өлкөбүздө боло турган мамлекеттик маанидеги иш-чаралар учурунда, айрыкча чет өлкөдөн келген делегацияларды коштоп жүрүү маалында борбордук жолдордо маал-маалы менен чектөөлөр болуп турарын эске алыңыздар. Айдоочулардан оор жана өзгөчө кооптуу жүктөрдү ташыган чоң автоунааларын убактылуу токтотуп турууну өтүнөбүз", — деп айтылган билдирүүдө.
Жол милициясы айрыкча Бишкек — Балыкчы автоунаа жолдорундагы, "Манас" эл аралык аэропортунан тартып, Бишкек шаарына кирген жана калаанын ичиндеги көчөлөрдө чектөө болорун эскертти.
"Андан сырткары, жол жээктерине автоунааларды себепсиз токтотпоого жана аргасыз болгон учурларда сөзсүз уюлдук телефондорун автоунаанын алдыңкы терезесине жазып калтырып кетүүнү өтүнөбүз", — деп айтышты.