Бишкекте аял режиссерлордун кино жумалыгы өтүүдө. Бул тууралуу Асел Жураева Sputnik Кыргызстан радиосуна маек куруп жатып билдирди.
Анын айтымында, аталган иш-чаранын негизги максаты — аял режиссерлорду колдоо.
"Аталган жумалыкта айым режиссерлор тарабынан тартылган зордук-зомбулукка каршы тасмалар көрсөтүлүп жатат. Кызыккандар келип, акысыз көрүп кетсе болот. Күн сайын Тарых музейинде саат 16:00дөн 18:00гө чейин коюлууда. Кино жумалыгы 8-декабрда жыйынтыкталат. Тасмаларды көрүп эле кетип калбастан, авторлор менен бирге талкуу да жүргүзүп жатабыз. Иш-чаранын негизги максаты — айым режиссерлордун чыгармачылыгын колдоо. Ачылышында "Башка бирөө" жана "Кыргыздын кыраан кыздары" тасмалары тартууланды. Өлкөбүздө негизинен кино тарткан кыз-келиндер абдан аз. Бирок барган сайын акырындык менен саны өсүп жатканы кубантарлык көрүнүш. Биз бири-бирибизди колдоп, "Мен сага ишенем" деген сөздү көбүрөөк айтышыбыз керек", — деди режиссер.
Ал жумалыкта көрсөтүлүп жаткан тасмалардын ар биринде адамзатка, анын ичинде өзгөчө кыз-келиндерге тиешелүү көйгөйлөр экран аркылуу коомго айтылып жатканын кошумчалады.