БИШКЕК, 6-дек. — Sputnik. Түркиялык инвесторлор Кант жана Кара-Балта шаарларында жаңы заводдорду курат. Бул тууралуу министрлер кабинетинен билдиришти.
Маалыматка ылайык, түркиялык ишкерлер Кара-Балта шаарына таштандыны кайра иштетүүчү заводун, ал эми Кант шаарына асфальт жана пластик тетиктерин өндүрүүчү завод курууну пландаштырып жатат.
Министрлер кабинети инвесторлор ар бир долбоорго 5-25 миллион долларга чейин сарптай тургандыгын билдирген. Ошондой эле чет элдик ишкерлердин Чүй облусунун Аламүдүн районуна текстиль фабрикасын жана сүттү кайра иштетүүчү завод курууга кызыкдар экендиги кошумчаланды.