Быйыл спортко каралган акчага дагы кошумча 150 миллион сом каражат бюджеттен бөлүндү. Буга чейин спорттун артыкчылыктуу түрлөрүнө гана басым жасалып келсе, кийинки жылдан тарта улуттук спортту көтөрүүгө, олимпиадалык эмес спорттун түрлөрүн жакшыртууга да көңүл бурулат. Бул тууралуу Канат Шабданбаев Sputnik Кыргызстан радиосуна маек куруп жатып билдирди.
"Кыргызстанда быйыл спортко жакшы көңүл бурулду. Курама командалардын окуу-машыгуу жыйындары убагында өтүп, биздин спортчулар эл аралык мелдештерде мыкты жетишкендиктерди жаратышты. Каржылоо маселеси убагында чечилип, көңүл бурулса сөзсүз жыйынтык болот эмеспи. Ушул жылы аталган тармакка каралган акчага кошумча бюджеттен 150 миллион сом каражат бөлүндү. Буга чейин спорттун приоритеттүү түрлөрүнө гана басым жасалып келсе, кийинки жылдан тарта улуттук спортту көтөрүүгө, олимпиадалык эмес спорттун түрлөрүн жакшыртууга да өзгөчө көңүл бурулат. Анткени мамлекеттик мамиле абдан зарыл. Быйыл Каржы министрлиги менен тыгыз иштешип, алар бизге көп жагынан көмөктөшүп, тиешелүү акчаны убагында бөлүп беришти. Мындан тышкары, Дене тарбия жана спорт боюнча департаментинин кредитордук карыздары жабылып, эми бул тармакты каржылоо сапаттуу жүрөт. Спортко республикалык бюджеттен акыркы 5-6 жылда 950 миллион сомдун тегерегиндеги акча бөлүнүп келсе, эми айлыктар да көтөрүлүп учурда 1,3 миллиардды түзүүдө. Анын 70 пайызы маянага, социалдык төлөмдөргө жана башкаларга жумшалат",— деди Шабданбаев.
Ошондой эле адис спорттун приоритеттүү түрлөрүн көбөйтүүгө каражат жетиштүү экендигин кошумчалады.