БИШКЕК, 5-дек. — Sputnik. Жогорку Кеңештин эл аралык иштер, коргоо, коопсуздук жана миграция боюнча комитети 12 жылдык окууга өтүү долбоорун артка кайтарды.
Депутат Айбек Осмонов убагында 10 жылдык система менен деле окушканын, Европанын университеттерине өтүүнү жүйө келтирүү туура эместигин айтты. Ал эми Жылдыз Таалайбек кызы мектептеги шарттар, коомчулук буга даяр эместигин билдирип каршы чыкты. Улан Бакасов да коомчулук каршы болуп жатканын белгилеп, долбоорду артка кайтарууну сунуштады.
Билим берүү жана илим министри Уланбек Мамбетакунов Азия өнүктүрүү банкынын секторду өнүктүрүү программасы аркылуу мектептеги билим берүүнү реформалоого 40 миллион доллар жардам көрсөтөрүн билдирди. Бул келишимдин шарты боюнча каражат 12 жылдык окууга өтүүгө жумшалат.
"12 жылдык окуу бүгүнкү күндүн талабы болуп жатат, чет өлкөдө окуйм деген жарандардан министрликке көптөгөн каттар келип жатат. Европадагы жогорку окуу жайлар 12 жылдык система менен алат экен, биздин студенттер дароо өтпөй бир жыл даярдык курста окуп калууда. Анысы кошумча чыгым болууда. Учурда нөлүнчү класста окушат, бирок 11ди бүткөндө ал аттестатына жазылбайт. Биз ошону эле мыйзамдаштырып коёлу деп жатабыз. Азыркы 11 жылга нөлүнчү классты кошкондо деле 12 жыл болуп жатпайбы. Америкада, Италия, Германияда, Япония жана Кытайда ушундай талап бар. Мындай системаны бүгүн эле киргизе койбойбуз, бир-эки жыл даярданышыбыз керек. Анан бала бакчадан даярдык тайпасына баруунун ордуна 1-класска алынат. Азыр 17 жашында 11-классты бүтүп жатса ошондой эле болот. Бир жыл кошулуп же кемибейт", — деди Мамбетакунов.
Жыйынтыгында депутаттар добуш берип, Азия өнүктүрүү банкы менен болгон 12 жылдык билим берүү долбоору боюнча макулдашууну четке кагышты, тагыраагы, каражат алуу долбоорун ратификациялоону артка кайтарышты.
Добушка коюунун алдында министр да, финансы министринин орун басары Руслан Татиков да түшүндүрүүгө аракет кылганы менен аларга сөз беришкен жок.