БИШКЕК, 2-дек. — Sputnik. Евразия экономикалык комиссиясы Евразия экономикалык биримдигинин бирдиктүү биржалык рыногун түзүү концепциясынын долбоорун сунуштады. Бул тууралуу ЕЭКтин маалымат кызматы кабарлады.
Документ 14 бөлүмдөн туруп, максаттарды, милдеттерди, принциптерди, механизмдерди, товарлардын бирдиктүү биржа рыногун түзүүнүн этаптарын, анын иштешин камсыз кылууну жана башка жоболорду камтыйт.
"Баа түзүүнүн ачык-айкындуулугун камсыз кылуу максатында биржа жана биржадан тышкаркы рыноктун объективдүү баа көрсөткүчтөрү түзүлөт. Аны менен катар биржа жана биржадан тышкаркы рыноктун келишимдери жөнүндө маалыматтарды чогултуу жана аны талдоо механизмдери дагы пайда болот. Баа түзүү принциптери чарбалык субъектилердин тигил же бул өлкөгө таандык экендигине карабастан жалпы, баарына бирдей деп саналат", — деп айтылат концепциянын долбоорунда.
Концепциянын долбоорун талкуулоо боюнча эксперттердин жыйыны 22-декабрда өтөт.
Маалымат
ЕАЭБ алкагында товарлардын бирдиктүү рыногун түзүү боюнча жумушчу топ 2021-жылдын апрель айында түзүлгөн. Анын курамына биримдикке кирген өлкөлөрүнүн ыйгарым укуктуу органдарынын, биржаларынын жана мүчө мамлекеттердин биржа товарларын өндүрүүчүлөрүнүн өкүлдөрү, ошондой эле ЕЭК өкүлдөрү кирди.
Бирдиктүү биржа товар рыногун түзүү Стратегия-2025 тарабынан каралган. ЕАЭБ товарларынын бирдиктүү алмашуу рыногун түптөө концепциясын 2023-жылдын 30-сентябрына чейин, ал эми аны өнүктүрүү программасын 2024-жылдын 31-декабрына чейин бекитүү пландаштырылууда.