БИШКЕК, 29-ноя. — Sputnik. Экономика министрлиги "Дордой" жана "Кара-Суу" базарларында соода кылгандарга өзгөчө зонадагы салык режимин киргизип, ККМ колдонуудан бошотуу мыйзам долбоорун сунуштады. Аталган демилге бүгүн Жогорку Кеңештин тармактык комитетинде каралды.
Экономика министринин орун басары Искендер Асылкуловдун айтымында, аталган эки базар Кыргызстандагы стратегиялык маанидеги объектилерге кирет. Өзгөчө зонадагы салыктык режим "Дордой" менен "Кара-Суу" базарларында гана иштейт. Ал жайларда 22 238 соода түйүнү бар. Мындай зонада соода кылгандар контролдук-кассалык машиналарды колдонуу милдетинен бошотулат, бирок жылдык соода жүгүртүүсү тууралуу декларация тапшырып, ошого жараша салык төлөйт.
Салыктын ставкасы бир соода түйүнү үчүн жылдык жүгүртүүсүнө карап төмөндөгүдөй белгиленет:
соода жүгүртүүсү 4 миллион сомго чейинкилер — 18 миң сом салык төлөйт;
8 миллионго чейин — 42 миң сом;
8ден 15 миллион сомго чейин — 96 миң сом;
15тен 22 миллион сомго чейин — 168 миң сом;
22ден 30 миллион сомго чейин — 252 миң сом;
30дан 50 миллион сомго чейин — 360 миң сом;
50дөн 100 миллион сомго чейин — 500 миң сом;
100дөн 150 миллион сомго чейин — 800 миң сом;
150дөн 200 миллион сомго чейин — 900 миң сом;
200 миллион сомдон жогору — 1 миллион сом.