БИШКЕК, 28-ноя. — Sputnik. Украинанын бардык аймактары боюнча электр энергиясы дагы деле өчүп жатат. Мунун себеби электр түйүндөрүндөгү кубаттуулуктун жетишсиздиги экендигин "Укрэнерго" улуттук энергетикалык компаниясынын билдирүүсүнө таянуу менен РИА Новости жазды.
Маалыматта кубаттуулуктун азайышы бир нече электростанциялардагы блоктордун авариялык өчүрүлүшүнөн улам болуп жатканы белгиленген.
"Ошол эле учурда күн сууктап, электр энергиясы көп керектелүүдө. Ушул тапта кубаттуулуктун жетишсиздиги 27 пайызды түзөт", — деп айтылат маалыматта.
Украинанын Волынь облусунун жергиликтүү бийлиги жашоочуларынын 30 пайызында гана электр энергиясы бар экендигин маалымдаган. Ал эми Черновицкая облусунда жалпы керектөөчүлөрдүн 40 пайызында гана жарык бар. Киев шаарынын башчысы Виталий Кличко электр кубатынын улам-улам өчүшү жазга чейин уланарын жашырган эмес.
Кличко Киевдин жашоочуларын азык-түлүк, суу, жылуу кийимдерин түгөлдөп, телефон, пауэрбанктарын кубаттап турууга чакырган. Ал мындан да жаман абал болуп калышы мүмкүн деп коңгуроо кагып, андай болсо шаардын айрым тургундарын калаанын сыртына чыгаруу керектигин кошумчалаган. Бирок бул толук эвакуациялоо дегенди түшүндүрбөйт деген ал.
Россиянын Коргоо министрлиги 23-ноябрда Украинанын аскердик башкармалыгы жана ага байланыштуу болгон энергетикалык объектилерге массалык сокку жасалганын, белгиленген бардык объектилер андан жабыркаганын билдирген. Мекемеден сокку Киев шаары боюнча жасалбаганын, шаардагы кыйроолор Украинанын калктуу кварталдарында жайгашкан абадан коргонуучу ракеталардын кулагандыгынан болуп жатканын белгилеген.
Россиянын Куралдуу күчтөрү Украинанын инфраструктураларына соккуну 10-октябрда, тактап айтканда, Крымдагы көпүрө жардырылгандан кийин баштаган. Россиялык бийликтин айтымында, бул терактынын артында украиналык атайын кызмат турат. Сокку энергетика, коргонуу өнөр жайлары, аскердик жана байланыш түзүмдөрү боюнча объектилерге жасалууда. 15-ноябрдагы соккудан кийин Украинанын премьер-министри Денис Шмыгаль өлкөнүн энергетикалык системасынын дээрлик жарымы иштен чыкканын билдирген.