Кыргызстанда биринчи жолу жаш киносынчылардын уюму түзүлдү. Бул тууралуу Тыныстан Темиржан уулу Sputnik Кыргызстан радиосуна маек куруп жатып билдирди.
Анын айтымында, ата мекендик тасмалар — ачылбаган кенч.
"Быйыл жазында кинокритика боюнча мастерской уюшулуп, ага 10 окуучу кабыл алынган. Окуунун жүрүшүндө Кыргызстанда эмне үчүн киносынчылар жокко эсе деген маселе көтөрүлдү. Жыйынтыгында алган билимибиз жөн эле калып калбасын деп Кыргызстанда алгачкы жолу жаш киносынчылар уюмун негиздедик. Башында рецензияларды бир гана ата мекендик тасмаларга жазабыз деген чектөө бар болчу. Анткени өлкөбүздө тартылган тасмалар — ачылбаган кенч. Аларды жөнөкөй көрүүчү түшүнбөгөн же маани бербей кеткен жерлерин биздин уюмдун киносынчылары кеңири айтып, коомго жеткирүүгө аракет кылып баштады. Бирок жакында эле аталган чектөөнү алып салып, мындан ары чет элдик тасмаларга да рецензия жаза турган болдук", — деди Темиржан уулу.
Ал Кыргызстандагы киножаратмандардын көбү буга чейин киносынчылардын уюмуна суусап келгенин кошумчалады.