Дүйнөлүк саламаттык сактоо уюму тогуз жаштан 14 жашка чейинки кыздарды эмдөөнү сунуштаган. 2006-жылдан бери папилломага каршы эмдөөнү дүйнөнүн 112 өлкөсү жүргүзүп келүүдө. Уюмдун изилдөөлөрүндө бул өлкөлөрдө папиллома вирусунун жайылышы 70 пайызга, ал эми жатын моюнчасынын рагы эки эсеге төмөндөгөнү айтылат. Бул тууралуу Бурул Асыкбекова Sputnik Кыргызстан радиосунун эфиринде маек куруп жатып билдирди.
Анын айтымында, Кыргызстанда жатын моюнчасынын рагы менен ооругандардын 40 пайызы өтө кеч баскычында аныкталат.
"Адамдын папиллома вирусу — жыныстык жол менен жуга турган инфекция. Орто эсеп менен калктын 70-80 пайызы бул вирусту жугузуп алат. Анын 200дөн ашуун түрү белгилүү. Айрымдары аялдар арасында жатын моюнчасынын, жыныс кынынын рагына алып келиши ыктымал. Кыздар жыныстык катнашка барганга чейин анын организминде иммунитет пайда болуп калышы керек. Иммунитет пайда болгондо гана организм вирус менен күрөшө алат. Ошондуктан бул вакцина кыздар үчүн маанилүү. 2021-жылы коронавируска каршы эмдөө башталганда да түрдүү, чындыкка дал келбеген маалыматтар тарап кеткен. Ата-энелердин көбү эмдөө ыктыярдуу болгонунан улам баш тартып келет. Эң эле эффективдүүсү – маалыматтык кампанияны күчтөнтүү керек. Азыр диний көз караштан улам эмдөөдөн баш тарткандардын саны азайып калды. Кыргызстанда профилактикалык эмдөө календарына ылайык, 2022-жылдын 14-ноябрынан тартып 11 жаштагы кыздарды адамдын папиллома вирусуна каршы эмдөө жүрүүдө. Бизге 378 миӊ доза вакцина алып келинген. Папиллома вирусуна каршы эмдөө тууралуу мамлекеттик жана расмий тилде материал даярдалып, эки миңден ашык медицина кызматкерлери окутулуп, вакцина тууралуу маалымат берилген", — деди Асыкбекова.
Ал вакцинанын экинчи дозасы 2023-жылдын май айында сайыларын кошумчалады.