БИШКЕК, 19-ноя. — Sputnik. Электроника боюнча эксперт, физика-математика илимдеринин кандидаты Максим Назаренко Лента.Ру басылмасына телефондун кубаттагычын дайыма токко сайып калтыргандагы коркунучтар тууралуу айтып берди.
"Токтун жүрүшүндө байма-бай күч келип, айрым учурда чоң амплитуда менен чыңалуу болот. Мындай абал кубаттагычтын жарактан чыгышына алып келет. Күнүмдүк турмушта колдонулган электр түйүнүндөгү токтун чыңалуулары эң сапаттуу делген жабдууларды да бузушу мүмкүн", — деген Назаренко.
Физиктин айтымында, электр кубатындагы чыңалуулар катуу шамал, бороон, жаан жааган учурда көп болот. Бул кезде бардык эле электр шаймандарды сууруп койгон жакшы. Бирок жабдуу күйүп кетет деген коркунуч менен жүргөн да туура эмес.
"Негизинен дээрлик бардык кубаттагыч жабдууларда мындай өзгөчө учурлар үчүн коргой турган функциялар бар. Ошол эле учурда сапатсыздары да кездешет, мисалы, сиз телефонго сайган кабель, кубаттагыч ысып кеткенин байкасаңыз, аны алмаштырган оң", — дейт эксперт өз кеңешинде.
Ошондой эле ал көпчүлүк кубаттагычтар дайыма электр түйүнүнө сайылып турганга ылайыкташканын, бирок убакыттын өтүшү менен анын ички компоненттери эскирип кетерин кошумчалады. Өзгөчө арзан баадагы жана үч жылдан ашык пайдаланылган кубаттоочу жабдуулар мындай абалга кептелерин белгилеген.