БИШКЕК, 18-ноя. — Sputnik. Кыргызстандык окуучулардан турган топ "Интердом" деп аталган Стасова (Иваново) атындагы эл аралык билим берүү борборуна билим боюнча программага катышуу үчүн келишти. Бул маалыматты Россиянын Кыргызстандагы элчилигинен таратты.
Каракол шаарынан келген балдар үч ай ичинде орус тили боюнча билимин арттырып, орус маданияты, салттары менен жакындан таанышат. Алар үчүн маданий-агартуу программасы даярдалган.
"Балдардын тобу менен бирге кыргыз тили, адабиятынан, математикадан сабак берүү үчүн жана алардын жаңы шарттарга көнүшүнө жардам кылуу максатында педагогдор да келишти", — деп айтылган маалыматта.
"Интердом" борборунан мектеп арасында тажрыйба алмашуу программасынан билим алуу үчүн 13-14 жаш курагындагы 14 окуучу келгенин айтып беришти. Балдар билим алуу менен кошо эс алууну айкалыштырып, Россиядагы бир нече шаарларды кыдырып, ал калаалар менен жакындан таанышмакчы.