БИШКЕК, 17-ноя. — Sputnik. Мамлекет башчы Садыр Жапаров "Фондулук рынокту жана биржа ишин андан ары өнүктүрүү боюнча чаралар жөнүндө" жарлыкка кол койгонун президенттин маалымат кызматы кабарлады.
Билдирмеге караганда, дүйнөдө фондулук рыноктор мамлекеттик жана жеке компаниялар үчүн инвестициялык каражаттарды тартуунун натыйжалуу механизмин камсыз кылат. Кыргызстанда бул тармак азырынча жакшы өнүгө элек. Мындан улам бул тармакты өнүктүрүп, санариптештирүү процессин тездетип, жарандардын жана ишкерлердин финансылык инструменттерге жеткиликтүүлүгүн жогорулатуу максатында президент аталган жарлыкка кол койгону айтылды.
Документке ылайык, "Кыргыз фондулук биржасы" ЖАК менен "Борбордук депозитарий" ЖАКы баалуу металлдар секторун, товардык-чийки зат секторун жана мамлекеттик баалуу кагаздар секторун ишке киргизүү боюнча экономикалык долбоорлорду, анын ичинде мамлекеттин катышуусу менен ишке ашырган системаны түзүүчү улуттук институт болду.
Министрлер кабинетине берилген тапшырмалар:
"Баалуу кагаздар рыногу жөнүндө" мыйзамына Кыргызстандын финансы рыногунда Баалуу кагаздардын борбордук депозитарийинин ишин көзөмөлдөө жана көзөмөлдөө тартибине талаптар бөлүгүндө өзгөртүүлөрдү киргизүүнү караган мыйзамдын долбоорун иштеп чыгуу;
чарбалык субъектилердин фондулук рынокко чыгуу жол-жоболорун жөнөкөйлөштүрүү үчүн жагымдуу ченемдик-укуктук базаны түзүү;
аманаттардын деңгээлин жогорулатуу максатында жеке инвестициялык эсептердин долбоорун иштеп чыгуу;
региондордон инвесторлордун финансылык инструменттерге жеткиликтүүлүгүн жогорулатуу максатында "Кыргыз почтасы" аркылуу брокердик кызматтарды көрсөтүү мүмкүнчүлүгүн кароо;
мамлекеттик баалуу кагаздарды соодалоону "Кыргыз фондулук биржасы" ЖАКтын аянтчасына которуу;
"Кыргыз фондулук биржасы" ЖАКтын аянтчасында акцияларды баштапкы жайгаштырууну (IPO) жана калк, институттук жана чет өлкөлүк инвесторлор тарабынан фондулук биржа аркылуу мамлекеттик үлүш катышкан улуттук компаниялардын акцияларын (эң аз дегенде акцияларынын беш пайызын) сатып алууну жүргүзүү;
улуттук долбоорлорду жана өнүктүрүү долбоорлорун каржылоо үчүн фондулук рынокто финансылык инструменттерди чыгаруу жана жайгаштыруу;
климатты жана биотүрдүүлүктү сактоо боюнча долбоорлорду ишке ашырууга мамлекеттин тышкы карызын алмашууга, ошондой эле айлана-чөйрөнү коргоо, экология, жашыл экономика же социалдык чөйрөдөгү өнүктүрүү программалары чөйрөсүндө баалуу кагаздарды чыгаруу;
стартап-долбоорлордун фондулук рынокко чыгуусу үчүн шарттарды түзүү;
баалуу кагаздардын жана акциялардын өтүмдүүлүгүн кармап туруу үчүн мамлекеттик үлүш катышкан акционердик коомдордо корпоративдик башкарууну өркүндөтүү;
финансылык инструменттер менен, анын ичинде инвестициялык маркетплейстерде онлайн-соода жүргүзүүгө багытталган санариптик технологияларды киргизүү;
өлкөнүн фондулук рыногун капиталдардын эл аралык рыноктору менен интеграциялоо.
Министрлер кабинетине Улуттук банк менен бирге финансылык сабаттуулукту жогорулатуу, анын ичинде аманаттарга дем берүү боюнча ишти туруктуу түрдө жүргүзүү тапшырмасы да берилген.
Ошондой эле Россия-Кыргыз өнүктүрүү фондуна, Өзбек-Кыргыз өнүктүрүү фондуна, Венгрия-Кыргыз өнүктүрүү фонду сыяктуу өнүктүрүү институттарына инвестор катары активдүү катышуу сунушталган.