БИШКЕК, 16-ноя. — Sputnik. Польшадагы "ракета чатагына" Россиянын эч кандай тиешеси жок, ар бир маселени туура, так көрсөтүш керек. Бул туурасында РФ лидеринин маалымат катчысы Дмитрий Песковдун айткандыгын РИА Новости жазды.
Песков журналисттердин аталган окуяга Кремлдин "кыйыр жоопкерчилигин көрүп жаткан жоксуңабы" деген суроосуна "жок, көргөн жокпуз" деген жообун берген.
"Польшадагы чатак боюнча айтсам, Россиянын буга эч кандай тиешеси жок. Бул жерде ар бир маселени так жана туура аташ керек", — деп кошумчалаган маалымат катчы.
Эске салсак, 15-ноябрь күнү кечинде Польша ЖМКлары Украина менен чектешкен аймагына, тагыраагы, Пшеводув районуна эки ракета кулаганын билдирип, эки адам каза болгонун маалымдаган. Өлкө башчысы Анджей Дуда бул ракеталар кимге таандык экендиги тууралуу так маалымат жок экенин айтса, Польшанын Тышкы иштер министрлиги ракеталар Россияда чыгарылганын белгилеген. НАТОнун башкы катчысы Йенс Столтенберг Анджей Дуда менен сүйлөшүп, бардык фактыларды аныктоо керектигин билдирген.
Пентагон Польшага түшкөн ракета боюнча божомолдорго таянып, шашып билдирүү жасап жиберүүдөн алыс экендигин, фактылар керектигин, аны алууга мүмкүнчүлүк жетиштүү деген позициясын айткан.
Ал эми АКШ президенти Жозеф Байден 16-ноябрда эртең менен Балиде G20 саммитине катышкан G7 менен НАТОго мүчө-өлкөлөрдүн башчыларынын ыкчам жолугушуусун демилгелеген. Алдын ала маалыматтар ракеталар Россиядан учурулган деген версияны четке кагарын айтып, шашылыш жыйынтык чыгарбай турууга чакырган.
Россиянын Коргоо министрлигинин билдиргенине караганда, украин-поляк чек арасына ал күнү эч кандай сокку урулган эмес, ал эми сүрөттөгү талкаланган бөлүктөрдүн россиялык куралдарга такыр тиешеси жок. Ведомстводон польшалык ЖМКлардын "россиялык" ракеталар келип түштү деген билдирүүлөрүн абалды курчутуу үчүн жасалган чагымчылык деп баалаган. Министрлик Польшадагы окуя болгон жерден жарыяланган сүрөттөрдөн улам ал жерге украиналык ПВО С-300 системасынын урандылары келип түшкөнүн аңдоого болорун билдирди.