Панфиловчулар душманды Москвага киргизбей кармашкан. Бул тууралуу Самат Малабаев Sputnik Кыргызстан радиосуна маек куруп жатып билдирди.
Анын айтымында, Улуу Ата Мекендик согуш — кыргыз тарыхында ири апааттардын бири.
"1941-жылдын 22-июнунда фашисттик Германия Советтер Союзуна кол салган. Немецтер Прибалтика, Украина өлкөлөрүн басып, Совет армиясын чоң жоготууларга учураткан. Москваны коргоого дивизияларды даярдоо иштери башталган. Ошол учурда Кыргыз ССРинин аскер комиссары Иван Васильевич Панфилов болчу. Ал тапшырма боюнча бир айдын ичинде Орто Азия элдеринен 316-аткычтар дивизиясын түзгөн. Машыгуулары Казакстанда өтүп, курамы согушту көрбөгөн жөнөкөй адамдардан куралган. Мисалы, Дүйшөнкул Шопоков айылдагы трактор айдаган жигит болгон. Мына ошондой жигиттерден баатырларды даярдап чыгуу оңой эмес иш. Панфиловдун мыкты командир экенин тарых көрсөттү. Алгач аталган дивизия Ленинградга жөнөтүлүп, кийин Москваны коргоого жиберилген. Алар душмандарды Москвага киргизбей кармап, убакыттан жеңип беришкен. Ал тургай немец аскер башчысы Эрих Гёпнер булардын эр жүрөктүүлүгүнө баа берген. Аскердик тартип боюнча, дивизияга 8-10 чакырым жерди коргоого берилет. Бирок Советтик армияда аскердик жоготуулар көп болгондуктан панфиловчуларга 41 чакырым беришкен. Бул нормадан 3-4 эсе көп аймак. Генерал Панфилов аскердик тактиканы колдонуп, танк өтө турган жерлерге 25-30 кишиден турган отряддарды түзгөн. Ошол отряддын бири, даңазалуу 28 жоокер баатырларча курман болгон", — деди Малабаев.
Ошондой эле ал бир учурда 28 адамга баатырдык наам берген учур панфиловчуларга гана таандык экенин кошумчалады.
Эске сала кетсек, Улуу Ата Мекендик согушта Москвага кол салган фашисттик армиянын мизин алгачкы ирет панфиловчулар 1941-жылдын 16-ноябрында кайтарган.