БИШКЕК, 16-ноя. — Sputnik. Бишкек мэри Эмилбек Абдыкадыров жыл аягына чейин газ менен жүргөн 120 автобус алып келинерин айткан. Бүгүн транспорттун видеосу пайда болду.
Жаңы автобустар үчүн шаардык бюджеттен 1 миллиард сом бөлүнгөн. Ар бири запастагы тетиктерин кошкондо 91 миң доллардан айланды.
"Акча шаардык бюджеттен бөлүнгөн. Автобустарды эч бир долбоорсуз эле өзүбүз алып жатабыз. Андай долбоорлор 4-5 жылга созулуп кетүүдө", — деген мэр.
Буга чейин Башкы прокуратура автобустар кымбат алынганын, 155 миллион сом зыян келтирилгенин айтып чыккан. Мэрия маалыматты төгүндөп, транспорт башкалар сунуштаган баадан 20 пайызга арзан алынганын билдирген болчу.