БИШКЕК, 15-ноя. — Sputnik. Өзбекстандын премьер-министри Абдулла Арипов Кемпир-Абад суу сактагычынын маанилүүлүгү жана келишимдин шарттары тууралуу айтып берди.
Ал келишимди ратификациялоо үчүн өзбек парламентинин төмөнкү палатасына алып келген.
"Бул келишимге оңойлук менен жетише алган жокпуз. Өлкөбүз үчүн стратегиялык мааниге ээ болгон бир катар негизги маселелер чечилип жатат. Кыргызстандын аймагындагы Анжиян суу сактагычы (Кемпир-Абад — ред.) өлкөбүздүн айылдары үчүн өтө маанилүү стратегиялык объект болуп саналат. Азыр 171 миң гектардан ашык, Кыргызстандын 25 миң гектар жери сугарылат. Анын сыйымдуулугу 1 миллиард 576 миллион куб метр, аянты 4957 гектар. Биз ошол суу баскан жердин ордуна Анжиян облусунун Коргон-Төбө, Пашакор тилкесинен 1019 гектар жайыт жер берүүнү сунуштап жатабыз. Мурда Өзбек ССРи тарабынан 4 127 гектар жер суу сактагыч үчүн компенсация катары берилгенин белгилеп кетким келет", — деди Арипов.
Мындан сырткары, ал суу сактагычта тейлөө иштерин жүргүзүш үчүн Кыргызстан Өзбекстанга 19,5 гектар жер берип жатканын белгиледи.
"Өз кезегинде кошуналар менен достук мамилени сактап калыш үчүн суу сактагычты Кыргызстан элине айрым максатта колдонууга уруксат берилет. Кыргыз тарап суунун горизонтун 906дан 900 метрге түшүрүүнү талап кылды. Андан да көбүрөөк түшүрүү маселесин коюшкан, бирок 900 бойдон калтырдык", — деди Арипов.
Белгилей кетсек, кыргыз-өзбек чек арасын делимитациялоо жана демаркациялоо комиссиясынын төрагасы (кыргыз тараптан) Камчыбек Ташиев Кемпир-Абад суу сактагычын эки өлкө биргелешип башкара турганын билдирген. Ал эми Арипов мындай шарттар тууралуу айткан жок.