БИШКЕК, 14-ноя. — Sputnik. Өзбекстан парламентинин мыйзам чыгаруу (төмөнкү) палатасы Кыргызстан менен келишимдерди ратификациялоо боюнча мыйзам долбоорлорун жактырды. Бул тууралуу парламенттин маалымат кызматы кабарлады.
Кеп чек аралар жана Кемпир-Абад суу сактагычынын суу ресурстарын биргелешип башкаруу келишими жөнүндө болуп жатат.
Өлкө премьер-министри Абдулла Арипов бүгүн депутаттарга отчёт берди. Анын айтымында, Өзбекстандын тышкы саясатынын приоритеттүү багыты Борбордук Азия өлкөлөрү менен, тактап айтканда, Кыргызстан менен болгон мамилелерди мындан ары өнүктүрүү жана чыңдоо болуп саналат.
"Акыркы жылдары эки өлкөнүн президенттеринин бекем саясий эркинин натыйжасында көп тармактуу өзбек-кыргыз мамилелери жаңы деңгээлге көтөрүлдү. Жасалма тоскоолдуктар жоюлуп, байланыштар калыбына келтирилди", — деди Арипов.
Эми документтердин долбоорлору Сенатта (парламенттин жогорку палатасы) каралышы керек.
Буга чейин КР Жогорку Кеңеши документти ушул жумада карашы мүмкүн экендиги белгилүү болгон.
Кыргызстан менен Өзбекстандын парламенттери келишимдерди ратификациялашса, президенттер Садыр Жапаров менен Шавкат Мирзиёев кол коюп, ратификациялык грамоталарды алмашат. Ошентип кыргыз-өзбек чек арасынын 1400 чакырымдан ашуун маселеси чечилет.