БИШКЕК, 11-ноя. — Sputnik. Ушул жылдын сентябрь айында Кыргызстандан тышка 170,4 миллион доллар которулду. Мындай көрсөткүчтөрдү Улуттук банк жарыялады.
Сөз жеке жактардын акча которуу системалары аркылуу жүргүзгөн транзакциялары жөнүндө болууда. Анда акча түрдүү валюталарда которулган, маалыматта долларга которулуп берилди.
Бул рекорддук көрсөткүч. Адатта акчанын агымы азыраак болчу. Буга чейин 2019-жылдын декабрында 61,2 миллион доллар которулуп, максималдуу чекти көрсөткөн.
Жаздан тарта сыртка которулган акчанын көлөмү бир топко өсүп, рекорд арты-артынан жаңыланып жаткан. Ал эми июль айынан тартып сыртка 100 миллион доллардан ашык акча которулган.
Сыртка акча которуулар тууралуу кызыктуу көрсөткүчтөр:
Чет мамлекетке которулган акчанын көп бөлүгү адатта Россияга туура келчү, эми Түркияга жөнөтүлгөнү кескин көбөйдү. Сентябрь айында аталган өлкөгө которулган каражаттын суммасы 55,3 миллион долларды түзгөн. Бул көрсөткүч 2005-жылдан берки бардык мезгилдерден көп (дал ушул жылдан бери статистика жарыяланып келет, анын көлөмү 40,3 миллион доллар);
Сентябрь айында Кыргызстандан АКШга 3,3 миллион доллар которулуп, бул да рекорддук көрсөткүч болду. Ага чейин Кошмо Штаттарга которулган максималдуу сумма август айында болгон, анда анын суммасы 0,9 миллион долларды түзгөн. АКШга Кыргызстандан 2005-жылдан бери дээрлик 26 миллион доллар которулган;
Тогуз ай ичинде өлкөдөн чет мамлекеттерге 779,4 миллион доллар которулду. Бул 2005-жылдан берки эң жогорку көрсөткүч. Буга чейинки рекорд 2018-жылдын январь-сентябрь айларында болуп, анда 388,4 миллион доллар которулган;
Бирок чет мамлекеттерден өлкөгө которулган сумма сыртка чыккандагы акчага караганда бир топко көп. Сентябрда чет мамлекеттерден Кыргызстанга 291,9 миллион доллар келген.