Абанын кирдешинен улам улгайган адамдардын өнөкөт оорулары күчөп, жүрөк, астма, бронхит жана пневмония өңдүү өпкө илдеттери пайда болуп, ринит, аллергия козголот. Бул тууралуу Бурул Жусурова Sputnik Кыргызстан радиосунун эфиринде маек куруп жатып билдирди.
Анын айтымында, акыркы жылдары балдар арасында бронхиалык астма оорулары көбөйдү.
"Акыркы жылдары буга чейин балдар арасында жокко эсе болгон бронхиалык астма оорулары көбөйдү. Адистер муну калаанын абасынын кирдешине байланыштырып жатат. Андыктан балдарды көчөдө унаанын кыймылы көп учурда чыгарбай, сейилдөө үчүн туура убакытты тандоого чакырам. 2021-2023-жылдарга Чүй облусу, Бишкек шаарындагы абаны тазартуу боюнча мамлекеттик программа кабыл алынган. Дарыгерлер ыш, түтүн адамзатына канчалык зыян алып келип жатканы боюнча маалымат берип, элге түшүндүрүү иштери байма-бай жүргүзүлүүдө. Бирок эл анын кооптуулугуна анча маани бербей таштанды өрттөп, үйдү жылытуу үчүн ар кандай заттарды колдонуп жатат", — деди Жусурова.
Дарыгер мамлекет үйдү күн, электр энергиясы, газ менен жылытуу үчүн элге шарт түзүп берип, адистер жылытуунун альтернативдүү ыкмалары тууралуу көбүрөөк маалымат бериши керектигин кошумчалады.