Кунарсыз жайыттарды өздөштүрүү менен айдоо аянттарды көбөйтүүгө болот. Бул тууралуу Аскарбек Жаныбеков Sputnik Кыргызстан радиосуна маек куруп жатып билдирди.
Анын айтымында, инвентаризациянын жыйынтыгы менен кунарсыз жайыттардын аянты 500 миң гектарга чукулдаган.
"Өлкөнүн буудай менен өзүн-өзү камсыздоосу 75 пайыздан жогору болду. Өткөн жылы бул көрсөткүч 40 пайыздын тегерегинде болчу. Тоют өсүмдүктөрү арпа, жүгөрүнүн түшүмү өткөн жылга салыштырмалуу эки эсе көп болду. Ошондон улам ички базарда тоюттун наркы былтыркыдан кыйла төмөн. Натыйжада былтыр тоюттун экспортуна коюлган чектөө алып салынды. Мындан тышкары, өлкөдө дыйкандарды жогорку сапаттагы үрөн менен камсыздоо, асыл тукум малды көбөйтүүгө багытталган 309-токтом иштелип чыгып коомдо талкуу жаратты. Анын алгачкы редакциясында жердин 75 пайызын министрликтин карамагына өткөрүү каралган. Талкуу, сунуштардан кийин 50/50гө түшүрүлүп иштеп жатат. Алар учурда кооперативдерге, үрөн, асыл тукум мал чарбаларына экономикалык артыкчылыктуу чарбаларга приоритеттүү негизде берилүүдө. Ошондой эле инвентаризациянын жыйынтыгы менен кунарсыз жайыт 500 миң гектарга чукулдады. Ал жерлерге көп жылдык бак-дарактарды отургузуу үчүн мыйзам кабыл алынып, жобосу иштелип чыкты. Айыл чарба өсүмдүктөрүнүн башка түрлөрүн өстүрүүгө мүмкүндүк бар. Буга чейин айдоо аянттар 1 миллион 268 миң гектар болсо, кунарсыз жайыттарды өздөштүрүү менен ал 1 миллион 700 миң гектарга чыгарууга мүмкүндүк түзүлөт", — деди Жаныбеков.
Ошондой эле ал министрликтин башкы максаты өлкөнүн азык-түлүк коопсуздугун камсыздоо болуп саналарын кошумчалады.