БИШКЕК, 10-ноя. — Sputnik. Москвадагы "Домодедово" аэропортунда Бишкектен барган жүргүнчүлөргө жана аларды тосуп алган адамдарга беткапчандар кол салып, айрымдарын автоунаага күч менен отургузуп, акча салынган рюкзак, чемоданын тартып алышкан. Ал эми тонолгондор кийин токойдон табылганын Россиянын ИИМине таянуу менен РИА Новости жазды.
Башында "Домодедово" аэропортундагы полицияга белгисиз адамдар жарандарга курал менен кол салды деген да маалыматтар тараган. Полициянын алдын ала кабарлаганына караганда, Бишкектен барган жарандарга жана аларды тосуп алуу үчүн келгендерге беткапчан, куралданган топ кол салган.
"Автоматка окшош курал менен коркутуп, акча салынган баштык, чемоданын тартып алышкан. Андан соң тонолгондорду автоунаага отургузуп өздөрү алар менен кошо кеткен. Бир нече убакыттан кийин Транспорттук полиция токойго ташталган эки автокөлүктү, анын жанынан тонолгон адамдарды табышкан", — деп жазылган маалыматта.
Анда белгиленгендей, укук коргоочулар шектүүлөрдү издеп жатат. Учурда "Перехват" планы жарыяланган. Полиция уурдалган акчанын суммасын ачыктай элек, бирок РИА Новости агенттигине маалымат булактар Бишкектен барган жүргүнчүлөрдүн 4 миллион долларга жакын акчасын тоношкон деп билдирген.