Жакында map.kg аталышындагы биотүрдүү аймактарды камтыган карта ишке кирет. Анда Кыргызстандын кооз жерлерин таанытуу, жаныбарлар, өсүмдүктөр дүйнөсү көрсөтүлөт. Бул тууралуу Гамал Соронкулов Sputnik Кыргызстан радиосуна маек куруп жатып билдирди.
Анын айтымында, экологиялык картада жаңы туристтик маршруттар түзүлүп, жергиликтүү калк жана чет өлкөлүктөр үчүн жакшы табылга болот.
"Белгилүү фотограф Влад Ушаков менен чогуу Ecomap долбоорунун алкагында буга чейин экологиялык көйгөйлөрдү чагылдырган карта түзүп, топурактын, абанын, суунун булганышы, токойлордун мыйзамсыз кыйылышы, радиация сыяктуу маселелерди көтөрүп чыкканбыз. Бирок экологияга байланыштуу терс көрүнүштөрдү гана алып чыкпай Кыргызстандын кооз жерлерин, жаныбарлар, өсүмдүктөр дүйнөсүн чагылдыралы деп атайын долбоор жазганбыз. Жакында map.kg аталышындагы биотүрдүү аймактарды камтыган карта ишке кирет. 2016-2017-жылдары өлкөдөгү биотүрдүүлүктүн негизги аймактарын аныктоо иши жүрүп, республика боюнча 32 биотүрдүү аймак тизмектелген. Мисалы, Ысык-Көлдүн батыш жана чыгыш жээктери негизги орнитологиялык территория катары эсептелип, куштардын миграциясына таасири чоң. Биздин негизи максаттарыбыздын бири — аталган жерлерди кыдырып, туристтик маршруттарды түзүп, сүрөт, видеоматериалдарды картага киргизүү. Адамга жаратылышты сактоо, ага аяр мамиле кылуу сезимин жеткирүү зарыл", — деди Соронкулов.
Ошондой эле адис ички туризмдин өнүгүшү жаратылышты сактоого, адамдардын патриоттук сезимин ойготууга түрткү болорун кошумчалады.