Бишкек шаары кышкы жылытуу мезгилинде эле эмес, жайкысын да кирдеп жатат. Буга калктын интенсивдүү өсүшү, унаалардын эскилиги, сапатсыз мунай майынын колдонулушу, таштандылардын кайра иштетилбей күйүп түтөшү, колдонулган көмүрдүн начар сапатта болушу себеп. Мындай маалыматты Айгүл Ырсалиева Sputnik Кыргызстан радиосунун эфиринде маек куруп жатып билдирди.
Анын айтымында, Бишкектеги унаалардын ар бир үчүнчүсү эски экенин эске алып, газ же электр энергиясы менен жүргөн машиналарды алып келүүгө убакыт келди.
"Быйыл Бишкектин абасы былтыркыдан дагы кир болот. Үйдү жылытуу үчүн колдонулуп жаткан көмүр толук жетилбей эле ташылып жатат. Аны жакканда түтөп, көп күл чыгып, анча жылуулук бербейт. Биз көмүрдү кара алтын деп баалап, жапырт колдонуп жатабыз. Учурда экологиясы таза делген Скандинав өлкөлөрү көмүрдү айрым өнөр жайда колдонгону эле болбосо, андан баш тартышкан. Бирок, тилекке каршы, миӊ айтканыбыз менен Кыргызстан өнүгүп келе жаткан мамлекет болгондуктан азырынча мындай кадамдарга экономикабыз жол бербейт. Ошентсе да жогору жакта отургандар маселени изилдеп, келечекте ишке ашырчу долбоор катары даярдык көрүшү зарыл. Калкка шарт түзүп берүү керек. Ушул маселе боюнча жазган биздин илимий эмгектер да бар", — деди Ырсалиева.
Ал Кыргызстанда ачылган озон борборунун жана башка адистердин активдүү жүргүзгөн иштеринин натыйжасында 2022-жылы озон катмары өз калыбына келтирилгенин кошумчалады.