БИШКЕК, 4-ноя. — Sputnik. Жогорку Кеңештин депутаты Жеңишбек Токторбаев малдын башынан салык алуу боюнча демилгесине кайрадан түшүндүрмө берди.
Эске салсак, ал ЖКнын жыйынында эл өкүлү айылдагылар шаардыктардан кем эмес шартта жашаарын, бир үйдүн 3-4төн автоунаасы бар экенин айтып, мал кармагандарга салык киргизүүнү сунуштаган.
Койго 100 сомдон, бир жылкыга 250 сомдон, бодо малга деле 250 сомдон салык киргизүүнү сунуштаган.
Бүгүн ал айткандары боюнча коомчулукка кайрадан түшүндүрмө берди.
"Бүгүнкү күнү республикабыздын аймагында 1 000-2 000 кой, 100дөгөн жылкы жана уйлары бар бай адамдар көп. Мен салыкты аталган мал-жандыгы көп, бай адамдарга киргизүүнү сунуштагам 1000 - 2 000 кою бар бай адамдар бир тыйын салык төлөбөйт. Жайытта байлардын малынын көптүгүнөн улам мурункудай жапжашыл болуп, бийик өсүп турган чөп азыр жок. Жайыттар такыр болуп, жылдан-жылга чөптүн түрү дагы азайып жатат", — деп жазды депутат социалдык тармакка.
Ал салык төлөө кимдерге тиешелүү экендигин түшүндүргөн.
"Карапайым, 40-50 кою, 5 ую, 5 жылкысы бар жарандарга бул салык жайылтылбайт. Алар мурдагыдай эле жайыт акысын төлөй беришет. Бул маселе эртеби-кечпи көтөрүлө турган реалдуу маселе болчу. Бул маселени буга чейин эч ким көтөргүсү келген эмес, анткени элге, шайлоочуларына жаман көрүнүүдөн коркушкан", — деген Токторбаев.
Мал башына салык алуу маселесин көтөрүп жатканда жалпы статистиканы да айткан. Бүгүнкү күндө Кыргызстанда 2 миллионго чукул ири мал, 700 миң жылкы жана 8 миллионго чамалаган кой бар экени белгилүү болду.