БИШКЕК, 4-ноя. — Sputnik. Санкт-Петербургдун тышкы байланыш боюнча комитетинин төрагасынын биринчи орун басары Сергей Марков Бишкек тургундарын Ленинград блокадасы чагылдырылган сүрөт көргөзмөгө келүүгө чакырды. Ал Sputnik Кыргызстан агенттигинин маалымат борборунда өткөн брифингге катышкан.
"Бишкектин жашоочуларын Тарых музейинде уюштурулган көргөзмөгө чакырып кетем. Ленинграддын блокадасы чагылдырылган 17 фотопанель бар. Көргөзмөгө Кыргызстан менен болгон байланышка арналган 17-планшет кошулду. Ал республикадан барган жоокерлердин Ленинград фронтундагы эрдигин жана жүрөгүбүздө сакталган тарыхый учурдун ролу канчалык экенин айгинелеп турат. Балдарыңыздар менен келиңиздер, жалпы тарыхыбыз менен алар да таанышсын", — деди Марков.
Эскерте кетсек, Бишкекте "Кыргызстандагы Петербург жолугушуулары" башталды. Бул Санкт-Петербургдун тышкы байланыш боюнча комитети тарабынан уюштурулган бир катар иш-чаралардын комплекси. Сүрөт көргөзмөсү 4-9-ноябрь күндөрү Бишкек жана Ош шаарларында болот.