БИШКЕК, 4-ноя. — Sputnik. Ысык-Көл ОИИБдин маалымат кызматы 44 жаштагы Алмазбек Аралбаев изделип жатканын айтып, анын сүрөтүн жарыялады.
Билдирмеге караганда, буга чейин ИИМ облустук милицияга социалдык тармакта Ысык-Көл облусуна караштуу Ананьево айылындагы Жусуп Абдрахманов атындагы орто мектептин мугалими 5-класста окуган окуучусунун атасын табышып коюуну суранып жазган посту боюнча билдирүү жиберген.
© Фото / пресс-служба УВД Иссык-Кульской области
Соцпедагог окуучунун апасы каза болуп калганын жазып, атасын табышууга көмөк көрсөтүүнү суранган. Буга байланыштуу ошол аймактагы милицияга териштирүү иштерин жүргүзүү тапшырмасы берилген.
"Укук коргоо органдары изделип жаткан адамдын ким экенин аныктап, анын үйүн таап барышкан. Туугандарынын айтымында, 44 жаштагы Алмазбек Аралбаев 2018-жылы Бишкекке, андан ары Россияга иштегени кеткен боюнча үйүнө келген эмес. Агасы милицияга арыз жазып, аны таап берүүнү өтүнгөн. Аталган факт Ысык-Көл ОИИБдин журналына катталып, Аралбаевди издөө башталган", — деп айтылат билдирмеде.
Аталган иштин жүрүшүндө Алмазбек Аралбаев ушул жылдын май айында Кыргызстанга учуп келгени белгилүү болгон. Бирок андан бери кайда жүргөнү тууралуу так маалымат жок.
Мындан улам ИИМ сүрөттөгү жаранды тааныган же ал тууралуу кандайдыр бир маалыматы барларды 102 кыска номери жана 0505233322 телефондору аркылуу милицияга кабарлап коюуну өтүндү.