БИШКЕК, 4-ноя. — Sputnik. Ленинград блокадасы жана коргонуусу мамлекеттик музейинин директору Елена Лезик блокадачылар жана алардын урпактарынын атынан Кыргызстанга Улуу Ата мекендик согуш учурунда көрсөткөн жардамы үчүн ыраазычылык билдирди.
Ал Бишкек менен Санкт-Петербург шаарларынын кызматташуусуна арналып Sputnik Кыргызстан маалымат борборунда өткөн брифингге катышкан.
"Урматтуу кыргызстандыктар, биздин меймандос досторубуз, согуш жылдарында көрсөткөн адамгерчилик үчүн Ленинград блокадачыларынын жана алардын урпактарынын атынан ыраазычылык билдирүүгө мүмкүнчүлүк түзүлгөнүнө абдан кубанычтамын. Кыргызстан ал оор мезгилде башкаларга салыштырмалуу фронтко көбүрөөк жылуу кийим-кече жөнөткөн эле. Бул чыныгы боор тарткан колдоо болгон", — деди Лезик.
Ал аталар мекенди ийиндеше коргогонун белгилеп, кыргызстандыктардын блокадада калган Ленинграддын балдарын бапестеп багып алганына токтолду.
Ленинграддын блокадасы 872 күнгө, 1941-жылдын 8-сентябрынан 1844-жылдын 27-январына чейин созулган. Көз жумгандардын так саны белгисиз, бирок болжол менен 400 миңден 1,5 миллионго чейин адамдын өлгөнү айтылып келет. Кыргыз ССРине 16 миңден ашуун киши эвакуацияланган, анын 3,5 миңи балдар эле.