БИШКЕК, 4-ноя. — Sputnik. Кыргызстандын бардык ички иштер органдарына убактылуу кармоочу жайларга жана коомдук жайларга (көчөлөр, мал базарлар сыяктуу) көзөмөл камераларын орнотуу тапшырылды. Бул тууралуу ИИМ кабарлады.
Калктын коопсуздугун камсыз кылуу, кылмыштуулук менен күрөшүү жана укук бузууларга бөгөт коюу максатында Ички иштер министрлиги тарабынан атайын программалар жана иш-чаралар планы бекитилген. Министр Улан Ниязбеков орнотулган камераларды укук коргоо органынын системасына кошууну тапшырды.
"Ар бир жетекчи тейлеген аймакка камераларды орнотуу боюнча чараларды көрүшү керек. Бул кылмыштардын бетин ачуу жана окуялардын алдын алуу максатында жасалууда", — деди министр.
Ниязбеков санариптештирүү милициянын артыкчылыктуу багыты экенин белгиледи.
"Кээ бир жетекчилер видеокамераларды орнотуу менен санариптик багытта бир нерсе кылдык деп ойлошу мүмкүн. Бирок бул багыт видеокамералар менен эле бүтпөйт. Анын негизги максаты — жарандардын коопсуздугун камсыздоо, кылмыштуулуктун алдын алуу", — деди министр.
Анын айтымында, ар бир облуста жана шаарда санариптештирилген коопсуздук базасы түзүлбөсө, "жарандардын бейпил жана туруктуу жашоосуна кадам таштоо мүмкүн эмес".